ប៉ាណាម៉ា៖ ក្រសួងសន្តិសុខសាធារណៈប៉ាណាម៉ា នៅថ្ងៃសៅរ៍ម្សិលមិញនេះបានបញ្ជាក់ពីការរឹបអូសគ្រឿងញៀនសរុបក្នុងចំនួនកំណត់ត្រាខ្ពស់បំផុតសម្រាប់ឆ្នាំ២០២២ ខណៈ​ដែល​ប្រទេស​នេះ​ជួប​ប្រទះ​នឹង​បញ្ហាជួញដូរគ្រឿងញៀន ដែលឆ្លងកាត់ប្រទេសរបស់ខ្លួន មុននឹងនាំចូលទៅកាន់ទ្វីបអឺរ៉ុប និងសហរដ្ឋអាមេរិក។

ជាក់ស្តែងចំនួនគ្រឿងញៀនដែលប៉ាណាម៉ារឹបអូសបាននៅក្នុងឆ្នាំ២០២២ មានចំនួនសរុប ១២៦,៥តោនដែលភាគច្រើនសុទ្ធសឹងតែជាសារធាតុកូកាអ៉ីន ហើយក៏ជាចំនួនកំណត់ត្រាច្រើនបំផុតពីរឆ្នាំជាប់ៗគ្នាផងដែរ។ 

រដ្ឋមន្រ្តីក្រសួងសន្តិសុខសាធារណៈ លោក Juan Manuel Pino បានប្រាប់ក្រុមអ្នកសារព័ត៌៌មានថា៖ "ប្រទេសប៉ាណាម៉ា បានក្លាយជាកន្លែងផ្ទេរ និងចែកចាយគ្រឿងញៀន ដែលនេះជាបញ្ហាធំបំផុតដែលអាជ្ញាធរត្រូវធ្វើប្រតិបត្តិការទប់ស្កាត់"។

ក្នុងចំណោមតួលេខខាងលើនេះ មានគ្រឿងញៀនប្រមាណ ២៣តោនត្រូវបានគេរកឃើញក្នុងទូកុងតឺន័រដែលធ្វើដំណើរលើមហាសមុទ្រអាត្លង់ទិកដែលមានទិសដៅនាំទៅកាន់សហរដ្ឋអាមេរិក និងទ្វីបអឺរ៉ុប។

គួរបញ្ជាក់ថា ចំនួនថ្នាំញៀន ១២៦,៥តោននេះត្រូវបានរឹបអូសពីប្រតិបត្តិការបង្ក្រាបចំនួន ៤៧១ករណី និងបានចាប់ខ្លួនមនុស្សចំនួន ៦១៩នាក់ ក្នុងនោះមានជនជាតិប៉ាណាម៉ាចំនួន ៤១៥នាក់ និង ២០៤នាក់ទៀតជាជនបរទេស៕